• Прадстаўленне мэты

Мэта напісаная на дошцы. Настаўнік яе агучвае і задае вучням пытанні на разуменне мэты.
Прыкладная інструкцыя па вызначэнні мэты ўрока для настаўніка:

• прадстаўце вучням запланаваную мэту ўрока;
• пагаварыце з вучнямі пра тое, што і навошта яны будуць вучыць;
• пераканайцеся, што мэта ясная і зразумелая вучням;
• прымайце і запісвайце мэту разам.

На працягу ўрока настаўнік вяртаецца да мэты і разам з вучнямі вызначае, як далёка яны прайшлі ў яе дасягненні. У канцы ўрока, падводзячы вынікі, вучні вызначаюць, наколькі яны дасягнулі пастаўленую мэту, і вызначаюць наступныя мэты для новых заняткаў.

• Ключавыя словы

Кожная тэма мае важныя ключавыя паняцці. На дошцы запісаны ключавыя паняцці тэмы ўрока. Настаўнік засяроджвае на іх увагу і просіць спрагназаваць, што могуць азначаць гэтыя паняцці. Даючы магчымасць вучням самастойна стварыць вызначэнне ключавых паняццяў, мы атрымліваем паведамленне пра тое, што зразумела вучням і з чым у іх праблемы.

• Што я ўжо ведаю?

Пачынаючы новую тэму, настаўнік прапануе вучням адказаць у парах на пытанне, што яны ўжо ведаюць па тэме. Затым ён збірае інфармацыю ад пар вучняў і пачынае працу з таго пункта, які выходзіць за межы наяўных ведаў вучняў. Вы таксама можаце папрасіць вучняў спытаць аднакласнікаў пра тое, што яны ўжо ведаюць па тэме, альбо даручыць класу запісаць гэта ў пачатку ўрока ў сшытках ці на лістках.
Дзякуючы гэтаму прыёму настаўнік не паўтарае вучням інфармацыю, якую яны ўжо ведаюць, а пачынае тэму ў патрэбным месцы. У выніку новыя веды набываюцца і замацоўваюцца разам з ужо набытымі ведамі, што вельмі карысна для працэсу навучання. Пры абмеркаванні інфармацыі, вядомай некаторым вучням, іншыя таксама вывучаюць яе і такім чынам вучацца адзін у аднаго.

• Ключавое слова згубілася

З напісанай мэты настаўнік выдаляе ключавое слова. Дае вучням 60 секунд, каб адгадаць яго. Прыклад. Тэма ўрока: Лічэбнік як часціна мовы. Мэты ўрока мовай вучня: у канцы ўрока вы зможаце распазнаваць … у тэксце, вызначыць, колькасны гэта ці парадкавы …; якім членам сказа з’яўляецца ...

• Табліца "Ведаю – Хачу даведацца – Даведаўся"

Можа быць выкарыстана для мэтавызначэння (распрацавана Донай Огл у 1986 г.). У кожнага вучня ёсць табліца «В – Х – Д», такая ж намалявана на дошцы або на вялікім аркушы паперы. На працягу ўрока вучні паслядоўна запаўняюць свае табліцы і разам агульную.

• Ведаю (сувязь з папярэднімі ведамі па тэме ўрока)
• Хачу даведацца (фармуліроўка ў выглядзе пытанняў)
• Даведаўся(лася) (падводзім вынік напрыканцы ўрока)
• Трохкутнік

Вучні малююць роўнабаковы трохкутнік з чатырма меншымі роўнабаковымі трохкутнікамі ў сярэдзіне. У кожным з іх яны запісваюць свае жаданні, звязаныя з вывучэннем дадзенай тэмы:

• Што я хачу ўбачыць?
• Пра што я хацеў бы спытаць?
• Што я хацеў бы пачуць пра гэта?
• Чым я хацеў бы займацца?

Гэтая тэхніка змяняе традыцыйны падыход да навучання і патрабуе ад вучня крэатыўнасці і рэфлексіі. Так мы дапамагаем вучням думаць пра тое, што яны хацелі б даведацца па гэтай тэме.

• 3-2-1

Мэта напісана на дошцы, сцікерах, аркушы, экране і г.д. Настаўнік просіць вучняў напісаць:
3 – рэчы, якія ведаю па тэме
2 – пытанні, якія ўзніклі ў сувязі з мэтай
1 – аналогію: на што падобна ...

• Мэта як анаграма

Настаўнік прадстаўляе некаторыя словы мэты як анаграму. Вучні адгадваюць словы і аднаўляюць мэту ўрока.

• Ідзем у Галівуд

Абярыце фільм, які адпавядае мэце навучання. Напрыклад, па тэме: "Тэмпература як экалагічны фактар" (Біялогія, 10 клас) можна ўзяць фільм «Ледніковы перыяд», дзе ідзе гаворка пра адаптацыю да змен. Настаўнік выкарыстоўвае відэафрагменты ці фота кадраў для фармулёўкі мэты вучнямі, якія будуць ведаць ролю тэмпературы ў жыцці жывых арганізмаў і працэсах эвалюцыйнай адаптацыі. Пасля кадраў мультфільма падключыце вучняў да больш сур'ёзнага абмеркавання мэты.

• 5 сказаў

Настаўнік дыктуе вучням 5 сказаў, якія звязаны з мэтай навучання без яе раскрыцця. Напрыклад, калі ўрок прысвечаны пэўнай хімічнай рэакцыі, можна прапанаваць некаторыя факты, якія ілюструюць гэту рэакцыю. Настаўнік пачынае з больш складаных і абстрактных падказак, паступова пераходзіць да лягчэйшых.

• Выявы-словы

Настаўнік паказвае некалькі выяў (фатаграфіі, малюнкі, інфаграфіка і інш.), якія маюць сувязь з мэтай урока. Просіць вучняў напісаць некалькі слоў, звязаных з тым, што яны бачаць на карцінках. Выкарыстоўваючы запісаныя словы, напісаць мэту ўрока.
Таксама можна выкарыстаць серыю малюнкаў. Настаўнік просіць вучняў размясціць іх у парадку, які ілюструе працэс, які абмяркоўваецца. Тэхніка вучыць прычынна-выніковай арыентацыі. Яе можна выкарыстоўваць па любой тэме, напрыклад, пры абмеркаванні гістарычных падзей і пры ўвядзенні схемы рашэнняў.

• Выклік

Настаўнік прадстаўляе задачы, якія трэба выканаць, як выклік альбо магчымасць праявіць сябе, а не як абавязак ці цяжар. Гэты від дзейнасці павінен стварыць унікальную і эмацыйную сітуацыю, якая запатрабуе ад вучня мужнасці і намаганняў для пераадолення перашкод і дасягнення поспеху. Дзякуючы такому падыходу настаўнік можа выклікаць у вучняў энтузіязм і жаданне больш актыўна ўдзельнічаць у працы.
Важна: Вучні не павінны быць здзіўлены выклікам. Настаўнік павінен выбраць адпаведны ўзровень і момант, каб вучні былі гатовыя яго прыняць. Вы не можаце кінуць выклік вучням супраць іх волі, таму што тады гэта будзе для іх хутчэй цяжарам і баластам. Выклік павінен мабілізаваць намаганні і вызваляць новую энергію, а не перагружаць. Як правіла, вучні задаволеныя, калі мы ставім перад імі амбіцыйную задачу. Важна, каб яны маглі разлічваць на дапамогу настаўніка і не баяцца магчымай няўдачы. Таксама карысным будзе даць заданні на выбар, каб вучань мог вырашыць, які ўзровень будзе для яго выклікам.

• Разгорнуты сказ

Настаўнік піша тэму буйнымі літарамі на дошцы. Зачытвае кароткі сказ, звязаны з тэмай. Гэта можа быць частка тэксту, які вучні будуць чытаць пазней, ці сказ параграфа падручніка. У малых групах папрасіце вучняў пашырыць сказ, дадаўшы 4 словы і сфармуляваць мэту ўрока. Праз некалькі хвілін папрасіце прадстаўніка з кожнай групы зачытаць сваю мэту навучання.
Мэта-анкетаваннеНастаўнік паказвае тэму ўрока, а затым прапануе вучням выбраць адзін з наступных варыянтаў. Пытанні для абмеркавання:
• Што б Вы хацелі даведацца сёння?
• Ці ёсць у вас навыкі, якія маглі б спатрэбіцца на гэтым уроку?
• Што можа перашкодзіць вашаму мысленню?
• Што падобнае вы ўжо ведаеце?
• Што з таго, што вы ўжо ведаеце, можа быць карысным?
• Што вы павінны зрабіць на гэтым уроку? Што вы можаце зрабіць?

• Усё наадварот**

Настаўнік стаіць перад класам і строга глядзіць на вучняў;
мэта ўрока змяшчаецца на слайдзе;
неабходна пераканацца, што мэта як мага больш грувасткая, заблытаная і незразумелая для дзяцей;
настаўнік бегла чытае яе (пры гэтым, усміхаецца) *
* даволі часта сустракаецца падчас правядзення ўрокаў
** гэта несапраўдная рэкамендацыя